The Irish in Britain, including those of Irish descent, make up a significant part of the UK population. Here, you will find news, entertainment, events, sports and features from the local Irish Post newspaper.

le Sharon Ní Chonchúir

Focal dainséarach is ea é an focal náisiúnachas. Is é is cúis leis na mílte coimhlintí ar fuaid an domhain. Is mar sin a bhí againn anseo in Éirinn ar feadh na céadta bliain. Agus, gan dabht, is mar sin atá go fóill i dtuaisceart na tíre.

Cuimhnigh siar sa stair — Wolfe Tone i 1798, Robert Emmet i 1803, Pádraig Mac Piarais agus a chomhpháirtithe i 1916 agus go leor eile mar iad — tá stair corraithe ag an dtír seo againne agus is é an náisiúnachas, nó an iarracht neamhspleáchas a ghnóthú, is cúis leis.

Le blianta beaga anuas, rinneadh dearmad ar an náisiúnachas céanna. Anseo, i ndeisceart na tíre, áit go bhfuil poblacht dár gcuid féin againn, bhí an rialtas — agus formhór de mhuintir na tíre — ró thógtha ag iarraidh feabhas a chur ar shaol shóisialta agus eacnamaíochta na hÉireann chun mórán ama a chaitheamh le náisiúnachas. Bhí ár neamhspleáchas buaite againn, cibé a bhí ag tárlúint i dtuaisceart na tíre.

Freisin, níor theastaigh ó pholaiteoirí an deiscirt an scéal a dhéanamh níos measa ó thuaidh. Bhí a dhóthain trioblóid sa tuaisceart gan a thuilleadh a chothú sa dheisceart. Mar sin, go caoithiúil, cuireadh an náisiúnachas ar leataobh.

Ach anois, tá gá leis arís. I mbliana, ar an seachtú lá déag d’Aibreán — Luan Cásca — beidh comóradh againn ar Éirí Amach 1916 i mBaile Átha Cliaith. Comóradh 90 bliain a bheidh ann, an chéad comóradh ó cuireadh an comóradh deireanach ar ceal i dtús na seachtódaí.

Mórshiúl míleata a bheidh ann. Beidh suas le 2,500 saighdiúir ar Shráid Uí Chonaill. Beidh eitleáin sa spéir. Beidh báid an chabhlaigh ar an abhainn. Léifear Fógra an Neamhspleáchais ós comhair Oifig an Phoist. Agus tá sé ráite go mbeidh gárda onórach ar dhíon na h-oifige.

Cad chuige é seo ar fad? Conas go bhfuilimíd ag céiliúradh an Éirí Amach i mbliana nuair nach raibh aon chomóradh againn le tríocha bliain?

Tá cúiseanna faoi leith leis. Ceapann daoine áirithe, mór tráchtairí na tíre ina measc, go bhfuil Fianna Fáil ag iarraidh an lámh in uachtair a fháil ar Shinn Féin.

Go traidisiúnta, i ndeisceart na hÉireann, b’iad Fianna Fáil an páirtí a chothaigh spiorad na náisiúnaithe réabhlóideacha. B’é Éamon de Valera a bhunaigh an páirtí — an fear céanna a throid in Oifig an Phoist Shráid Uí Chonaill agus é ina fhear óg. Ach, le déanaí, le fás Shinn Féin, bhí an baol ann go ngoidfí an teideal sin uatha.

Ní theastaíonn ó Bhertie Ahern go dtárlódh a leithéid. Teastaíonn uaidh a chur in iúil do mhuintir na hÉireann gur náisiúnaithe iad lucht Fianna Fáil maraon le Gerry Adams agus Martin McGuiness. Sin é an fáth go bhfuil siad ag eagrú an comóradh sonrach seo.

I mo thuairimse, níl anseo ach iarracht eile a thuilleadh vótaí a ghoid ar ais ó Shinn Féin. Beidh olltoghchán againn sara fada agus teastaíonn ó Fhianna Fáil é a bhuachtaint.

Ba cheart a thuilleadh díospóireacht a bheith againn faoin ábhar. Is cinnte gur féidir fréamhacha Shinn Féin a leanúint siar chomh fada le Éirí Amach 1916 agus mar sin is féidir a rá go seasann siad ar son shainmhíniú amháin don náisiúnachas Éireannach.

Ach is féidir an rud céanna a rá faoi gach aon pháirtí — Fianna Fáil, Fine Gael agus araile. Níl sé ceart nó cóir go mbeadh an náisiúnachas Éireannaí i seilbh aon pháirtí amháin. Is rud comónta é.

Tá daoine áirithe ag rá nár chóir an Éirí Amach a chomóradh in aon chor mar nár éirigh leis go fóill. Deireann siad nach féidir an íobairt a rinne Pádraig Mac Piarais ar son neamhspleáchas na hÉireann a chomóradh go dtí go mbeidh neamhspleáchas ag an dtír ina h-iomláine. Ceapann siad gur masla é an Éirí Amach a chéiliúradh agus tuaisceart na tíre fós faoi stiúir an Bhreatain.

Ceapaim féin go gcaithfear glacadh le staid an Tuaiscirt. Ní h-é sin le rá gur gá glacadh leis an dtroid agus an t-achrann. A mhalairt, caithfear gach iarracht a dhéanamh deireadh a chur leis an gcoimhlint agus síochán a bhuanú.

Ní fios dúinn an mbeidh Éire aontaithe riamh arís. Tá gach seans ann nach mbeidh. Mar sin, caithfimíd go léir bogadh ar aghaidh agus leas ceart a bhaint as an dtír atá againn.

B’fhéidir gur chóir an Éirí Amach a chéiliúradh. Is data tábhachtach é i stair na tíre. Ach, dá mbeinnse in áit na polaiteoirí, bheinn ag déanamh tréan iarracht comóradh a eagrú a chéiliúradh stair na tíre mar a bhí chomh maith le staid na tíre mar atá. Ní leor mórshiúl míleata chun é sin a dhéanamh.